Выстава “Канцэпт. Выбранае” І Трыенале Беларускага саюза мастакоў адкрыецца ў выставачнай зале Гомельскай карціннай галерэі Г.Х.Вашчанкі і прадставіць гледачам зрэз работ самых розных сучасных мастацкіх практык вядомых і маладых беларускіх аўтараў з Мінска і ўсіх рэгіёнаў Беларусі. Выяўленчае і прыкладное мастацтва, фатаграфія, арт-дызайн, інсталяцыі, асамбляжы — звыш 40 мастакоў напоўнілі прастору галерэі эксперыментамі з формай, пластыкай, колерам і святлом.
Сёння мастацтва, адлюстроўваючы сучасную рэчаіснасць, нясе ў сабе магутны зарад схаваных сэнсаў – філасофскіх, сацыяльных, іранічных, іррацыянальных… Нярэдка ідэя ідзе наперадзе выканання. Але часта і мастакам удаецца знайсці “залатую сярэдзіну”, каб яскрава адлюстраваць глыбокую і неардынарную задумку. І тады гледачы, якія ўжо прывыклі да “гульняў розуму”, маюць магчымасць атрымаць асалоду і ад інтэлектуальных загадак, і задавальненне ад адмысловай рэалізацыі.
Выстава “Канцэпт. Выбранае” І Трыенале Беларускага саюза мастакоў разгортвае перад гледачамі панараму творчых пошукаў у сучасным беларускім выяўленчым мастацтве. У экспазіцыі прадстаўлены як асобныя работы, так і цэльныя праекты аўтараў, удалыя прыклады скарыстання тэхнічных і эстэтычных навацый, гарманічнага спалучэння прынцыпова розных творчых накірункаў, канцэптуальнага змянення цэльных мастацкіх структур. Мы даем слова творчасці, якое адчувае сябе ўтульна па-за традыцыйнымі класічнымі рамкамі, стварае новыя формы і новыя сэнсы.
Выстава мае рэспубліканскі характар, да ўдзелу запрошаны як прафесійныя мастакі, так і студэнты і ўсе жадаючыя, якія прайшлі папярэдні адбор Беларускага саюза мастакоў.
Кожная з работ прадстаўляе асобныя канцэпты, у якіх ёсць эксперыменты з формай, пластыкай, колерам, святлом, гульня с сэнсамі і зместамі. Гледача чакаюць метамарфозы, трансфармацыі, актуалізацыі, ператварэнні. Скульптура і кераміка набываюць рысы арт-аб’ектаў, жывапіс арганічна становіцца асамбляжам, а тэкстыльныя кампазіцыі – пластыкай мікс-медыя. Па вялікім рахунку, справа не ў выкарыстанні нетрадыцыйных матэрыялаў, а ў новым вобразным складніку, маштабе зробленага аб’екта, яго асацыятыўнасці і актуальнасці”. Справа ў новай творчай ідэі. А выстава дэманструе вялікую колькасць такіх ідэй. Таму, несумненна, выстава для гледачоў і прафесіяналаў стане адлюстраваннем напрамку і дынамікі сучаснага культуранага працэсу.
Сярод удзельнікаў выставы шмат цікавых і знакавых аўтараў. У экспазіцыі можна пазнаёміцца з жывапісам Анатоля Кузняцова, Васіля Зянько, Канстанціна і Ангеліны Вашчанкі, Валянціны Ляховіч (Віцебск), Валерыя Песіна, Юрыя Несцерука (Магілеў). Прадстаўлены арт-аб’екты Ігара Саўчанкі, Анастасіі Балыш, Ганны Сілівончык, Аляксандра Малея (Віцебск), Надзеі Хмыль, сульптуры Андрэя Вараб’ёва, Марыі Тарлецкай, Сяргея Сотнікава (Віцебск).
Асобная частка экспазіцыі – сучасны беларускі тэкстыль, які можна аднесці да найноўшага феномена ў мастацтве, своеасаблівага “пластычнага выбуха” ў тэкстыльнай скульптуры. Гэта той самы тэкстыльны Art, які валодае велізарнай сімвалічнай сілай станковага або манументальнага твора. Які перадусім зыходзіць з канцэптуальнага адрыву ад укаранёнай у гісторыі мастацтва асацыяцыі тэкстылю з утылітарнасцю і рамяством.
І справа тут не ў новых тэхналогіях, можна працаваць і з традыцыйным гладкім пляценнем, – а ў новым вобразным складніку, у маштабе зробленага аб’екта, яго асацыятыўнасці і актуальнасці. Тэкстыль згубіў дэкаратыўнасць, перастаў быць двухмерным, выйшаў у прастору. З’яўленне трохмерных тэкстыльных арт-аб’ектаў дазволіла перавесці тэкстыль з катэгорыі “жывапіс” у катэгорыю “скульптура”. А лічбавыя тэхналогіі, святло, гук, новыя крэатыўныя матэрыялы – далі мастаку незвычайна шырокае поле для творчага эксперыменту.
У экспазіцыі выставы “Канцэпт. Выбранае” прадстаўлена канцэптуальная дэкаратыўная пластыка Вольгі Рэднікінай, Таццяны Макляцовай (Віцебск), Наталлі Лісоўскай (Віцебск), Таццяны Козік (Полацк).
Выстава будзе працаваць да 10 мая 2022 года.
